٧/٢٤/٢٠٠٧

كلمة السر

كلمة السر ...يعنى الباسورد
يعنى الايميل
يعنى الماسنجر
يعنى لا اى اى ولا زى زى
وسمعنى اجدع سلام
وما ترقصنيش يا جدع لانى من عائلة محافظة
....
عرفنا باسوردات بعض ...خلاص ايه يعنى ؟
تفتكروا ممكن يدخل الايميل بتاعى؟
يعنى فيها حركة مراقبة؟
وايه يعنى؟
مش شايفة ان فيها اى حاجة
ياخد الموبايل ويقعد يقلب فيه يمين شمال فوق تحت ...عادى بيعمله تمارين الصباح علشان يفضل نشيط
....
مش مفروض بينا ثقة ؟مش مفروض الصراحة هى اساس تعاملنا مع بعض
؟
عادى ..انا بالنسبة ليا عادى ...ماعنديش حاجة اخبيها عليه
ما عدا المدونة دى ...لانه لو عرف مش هعرف اكتب فيها بحريتى ...لان انا لسه يا دوبك بفهمه
ولا اقوله ؟اقوله على المدونة بالمرة ؟....لا مش هقوله عليها ...انا بكتب علشان اعرف اتعامل معاه يعنى فى مصلحته مش حاجة هتضره
ولو عرف....هيعمل ايه؟هيكون رد فعله ايه؟
مش عارفة
مش معقول كده ...انا مش صغيرة علشان يعاملنى على انى طفلة ....امال فين الثقة بقى؟
هو بخرج ويروح شغله ومع صحابه واكيد بيجيب سيرتى فى كلامه معاهم
انا بقى لا بخرج ولا باروح لصحابى ...فيها ايه؟

وكمان لما نويت افضفض خليتها فضفضة علنى ...يعنى ما بخبيش ولا حاجة ولا ايه رايكم؟
حاجة تجنن

هناك ٦ تعليقات:

روح يقول...

عادي جدا يابنتي الحاجت اللي بتقولي عليها دي بتحصل بين اي اتنين بس غلسة
ان كل شوية يعمل للموبايل تمارين الصباح دي وبعدين قلب في موبايلك قلبي انتي في موبايلة احنا خسرانين حاجة
يابنتي ماتعديلوش علي الوحدة كدة
ربنا يوفقكم يارب

هوندا يقول...

بصى هو عادى ملهاش دعوه بالثقه بس الطبيعى ان بيكون فى زى فضول كده او انه بيحب يتقرب للعالم بتاعك عايز يشوف موبيلك اميلك دى حاجات عاديه بس ده ميمنعش انه لازم يحترم خصوصيتك ولو حاجة ضايقتك متروديهالهوش يعنى مسك الموبيل سقعى ومتقوليش هات موبيلك كدا ممكن يبطل لوحده

غير معرف يقول...

روح
ـــــــــ
يارب
بس انا مش غلسة
ــــــــــ
هوندا
ــــــــ
فكرة برضه ...كلامك صح اهلا بيكى فى المدونة

MaMaDo يقول...

هو الفكره انه عايز يقرب منك يعرف المحيط الى انتى عايشا فيه
ف بيشوف الموبايل والايميل كده يعنى

كان ممكن انتى توضحى كده بأنك فى فترة الخطوبه فبتحكى له كل حاجه
ف مش بيحتاج انه بفتح ده او ده

و يا ستى ما انتى مش مخبيه حاجه
هو احنا بنخاف ما يفتح الايميل
ههههه

على فكره و انا بعمل الكومنت اختى قاعده جمبى و ماسه موبايل خاطبها و مش عارف بتعمل ايه فيه

ههههههههههههههه

catroz يقول...

تصدقى جيتى على الجرح بجد
الشخص اللى كنت مرتبطه بيه من فتره كانت دى تقريبا مشكلتى معاه
بصى كان بيغير اوى
بس برضه بالعقل كده كل حاجه و ليها حدود يعنى
كان بيقلب فى الموبيل
مش عارفه بيدور على ايه يعنى
و يقلب فى الايميل
مش عارفه برضه بيدور على ايه يعنى
و حاجات كتيره اوى كده
اخرجى قليل..متتاخريش
و الكلام ده كله
الموضوع دله خوف زياده عن اللزوم
و تحاولى تفهميه انه مش كده و ان الحب و الخوف ده ممكن يظهر بطرق تانيه يعنى
و لو اول مره اتكلمتوا و مفهمش
و تانى مره اتكلمتوا و مفهمش
تالت مره هيفهمك و هيقتنع
المهم حاولى بذكائك تحافظى عليه
و ربنا يكرمك و يوفقك يارب
......:)

لسه بعقلى يقول...

mamado
---------
الظاهر ان ده شىء طبيعى
------------------------
catroz
-------
ربنا يعوضك عنه خير
اكيد التفاهم مهم
انتى بتدينى امل
شكرا