12/27/2007

اخيرا تدوينة جديدة

انتو قلتوا مش ناسينى ولا حاجة
وانا كمان مش ناسياكوا طبعا
كفاية انكم شركائى فى رحلة الجنان.... اقصد الكفاح مع الراجل اللى هيجننى اللى ممكن نسميه دلوقتى حبيبى اللى هيجننى

المهم انا جاية النهاردة مش علشان اشتكى ولا احكى عن المغامرات اللى بينى وبينه
لكن علشان اقول الصبر جميييييييييييييييييل
رغم انى ساعات بحس ان الصبر ده هيجبلى الضغط ..لكن بلاقى فى الاخر ان التعامل مع المواضيع بنوع من اصبر والتفكير احسن كتير من العصبية والنرفزة
ومع انه بيقولى عايزك لما تزعلى ولا تضايقى منى اتصرفى على طبيعتك وزعقى وكل حاجة
لكن حاسة ان ده فخ ...عايزنى ازعق و اتنرفز علشان بعد كده يطلعنى انا اللى غلطانة
لكن على ميييييييييييين ...

الصبر جمييييييييييل

اعزرونى يا جماعة ان كنت اتاخرت فى الكتابة او مش بتابع مدوناتكم ...لكن والله انا ما بقاش فيا دماغ حتى افتكر انا اسمى ايه

هو صحيح انا كاتبة البوست ده ليه؟؟؟؟؟
اه علشان اقولكم الصبر جمييييييييل

حاجة تجنن!

11/05/2007

عيد الحب كان ..كاااااان امبارح


صباح الخير .....شوفتوا اللى حصل
امبارح كان كل الاحبة اتنين اتنين
عيد الحب
يعنى رومانسية ...رقة ...هدية ...دبدوب احمر وقلب احمر
يعنى يوم جميل على شط النيل ولا فى كازينو مشغل موسيقى هادية

ده كان تصورى انه هيحصل معايا انا بما انى مخطوبة ..بس الحقيقة بتقول انى محسوب عليا انى مخطوبة
لانه ما افتكرش ان امبارح كان عيد الحب
اتصلت انا بيه اقوله كل سنة وانت طيب ...قالى على ايه ؟
قلتله على عيد الحب
قالى يا شيخة ....عيد حب ايه ...انا ما بحبش الحاجات دى .....
!!!!!!!!!!!!!!!!!!!!!!!!!!!!!!!!!!!!!!!!!!!!!

حاجة تجنن

10/25/2007

ازيكو

انا ماليش نفس اكتب حاجة جديدة
حاسة انكم نسيتونى
وانا مش عارفة ليه مش عارفةاكتب
يمكن لان حياتى مش مظبوطة اليومين دول
ورغم ان عندى كلام كتير اكتبه
بس مش حاسة انى هقدر اكمل فى المدونة دى
معلش ان كنتم لسه فاكرنى
ومعلش انسونى

9/11/2007

الدور عليا انا

ازيكم ...هى السبب ...هوندا هى السبب ..هى اللى خلتنى اقعد افكر ....وجت عايزة افهم كملت عليا

هوندا بعتتلى التاج ..وعايزة افهم قالتلى فكرى فى مزاياه وعيوبه فى نفس الوقت
وطلعت فى الاخر بانى انا كمان ليا عيوب زى ما هو ليه عيوب
وبما ان رمضان على الابواب ...قلت اعترف بقى شوية

انا كمان عندى عيوب وتصرفات تخلى اللى قدامى يتجنن

منها انى ما ببطلش كلام ..رغاية يعنى ...ورغم انى ما بحبش حد يقاطعنى وانا بتكلم ..بقاطعه كتير فى كلامه ..وبحس ساعتها انه عايز يصرخ ويقولى اسكتى شوية ....
طبعا انا لو فى مكانه هروح كاتبة بوست على طول اسمه رغااااااااااااااااية

يبقى ده اول بوست ....تانى بوست كان هيتكتب عليا منه هو فلوووووووووووووسى
لانى كل شوية بدبسه فى خروجات وغدا وعشا ...واخر مرة اتعشينا برة كانت تدبيسة تمام ...كان ممكن نتعشى فى مكان تانى وندفع نص المبلغ اللى دفعه ...
هو طبعا ما قالش حاجة وطلع الفلوس وهو ساكت ...بس كنت حاسة انه هيعيط ...وانا ولا كانى شايفة حاجة ..اعمل ايه يعنى؟

تالت بوست ممكن كان يكتبه ...هو انا وخطيبتى وشغلى ...
لانه تقريبا طول الاسبوع مش فاضى ..شغل شغل شغل ...وانا طول الاسبوع بزهق فيه واقعد اقوله انت ما بتفضاش ابدا
انا عارفة انه الطبيعى انه يشتغل امال هيقعد فى البيت ؟كمان عارفة انى لما هرجع الكلية هبقى مشغولة زيه ...وانى بشتكى دلوقتى بس عشان انا اللى فاضية ...بس اعمل ايه يعنى ..بسلى نفسى بانى اتخانق معاه على شغله

رابع بوست :صحابى
هو ليه صحابه ..لسه معاهم ونصهم زيه لسه ما اتجوزوش
يعنى فاضيين ...بيخرج معاهم يتعزموا عند بعضهم وليهم مناسبات كتير مع بعض ..اعياد ميلاد ...خطوبة ..كتب كتاب ...تعيين جديد ..ترقية ...الخ الخ
طبعا لازم يروح ويجامل ويهنى ..ولو ما عملش كده يبقى مش صاحبهم بجد ....
انا بقى مالى؟ يعنى مرات نيجى نخرج ..ما ينفعش علشان صاحبه فى المستشفى ولازم يزوره ....مرة تانية يجى يزورنا فى البيت ساعة ويمشى عشان فرح واحد صاحبه وطبعا ما ينفعش اروح معاه
انا كتير بقوله صحابك اهم منى ...وانه بيقعد معاهم اكتر ما بيقعد معايا ..وهو يقولى مهو صحابه هما كمان ليهم حقوق عليه ...وزى ما بيعمل معاهم بيعملو معاه

الخامس :كلامها
ساعات ..وانا بقول ساعات بيبقى كلامى صعب قوى معاه ....ولا كانه واحد معرفوش
وساعات بتلخبط وما بعرفش اتصرف معاه فى مواقف سهلة جدا ..واحيانا بيصادف اننا نقابل حد من صحابه وانا بسكت خالص وما بتكلمش ..رغم انه بيكون انسان محترم ...احيانا برضه الصراحة بتبقى متعبة مش مريحة ..وانا بصارحه كتير ...يعنى بتعبه كتير رغم انى ممكن اقول نفس الكلام باسلوب تانى



المهم ...انا تقريبا كده ريحت ضميرى من موضوع عيوبى وعيوبه ...عشان بس ما حدش يقول انى بعمل نفسى ملاك

وكمان مرة بقول ...انا بفكر اقفل المدونة او اصارحه انى عاملة مدونة ...مش عارفة ...بس لو لاقتوها اتقفلت فى يوم من الايام اعرفو انى يا اما انا اللى قفلتها ..يا اما انا اللى قفلتها

9/05/2007

تاج هوندا..زى الميريندا

هوندا مررتلى تاج ...بالصدفة كده شفت اسمى عندها ما صدقت طبعا وجاوبت التاج
وادى الاسئلة ..بصراحة خدمت مدونتى كتير ..لانها خلتنى افكر فى حاجات ما كانتش على بالى
اتفضلوا معايا ...

الاول
------
1- اسم مدونتك

الراجل ده هيجننى

2- لماذا اخترته ..وماهي نيتك من وراء اختياره

اخترته علشان كل ما بيجننى خطيبى بفتكر الكلمة دى والاغنية دى ... الراجل ده هيجننى هيجننيييييييييييييييييي طير صواميل عقلى منى

عقلى منييييييييييييييي

3-هل فكرت في إغلاق مدونتك؟ والسبب

ايوة ولسه كنت هكتب كده فى المدونة ..لانى حاسة انى عايزة اقول لخطيبى عليها بس مترددة فبقول اقفلها احسن

4- - صورتك في المدونة ورمزيتها ؟؟

قطة صغيورة منكوشة حبتين ...بترمز ليا وانا محتارة من خطيبى ...بس لسه بعقلى

5- لماذا دخلت عالم التدوين من الاساس ؟

عشان افش غلى واطلع زهقى

6-جمله قيلت لك فى وصف مدونتك؟

قالولى مدونة مفيدة ...بتناقش امر الدنيا كله ...تصوروا!!!!

7-التعليقات بالنسبه لك ,اهميتها؟

انا من غير تعليقات الناس اللى هنا هتجنن رسمى ..انا اكتشفت انهم انقذونى من الجنان ورايهم مهم جدا جدا لحياتى ...خاصة روح ..ماحدش يزعل يا جماعة لانى بحبها زى اختى بالظبط

8-احلى بوست كتبته ...ضع اللينك , ثم اذكر لماذا؟

المدونة تعتبر جديدة والبوستات قليلة ..ومافيهاش اى حاجة حلوة دى كلها اسئلة

9-أفضل بوست قرأته؟ وضع لينكه

والله كله حلو ..وللاسف انا مش بفتكر مين اللى كتب ايه؟بس المهم الكلام يفيدنى


10-أفضل مدونة قرأتها

والله المدونات كتير ما ينفعش اقارن بينها

11-حد قل أدبه فى التعليق إيه رد فعلك؟

هقوله كده عيب ...وهشيل تعليقه

12-اسوا بوست اسوا مدونة ؟
مابلاش لحسن حد يزعل

13-هيحصل ايه لإيميلك لما تموت ؟

خطيبى عارف الباسورد ...يتصرف هو

14-اديت الباسوورد لحد قبل كده؟

ايوة ..الراجل اللى هيجننى ...خطيبى

15-اسمك؟

اشمعنى؟

--16-المشهور بيه وسط اصحابك؟

بلا وجع دماغ

17-شخصيتك من اى نوع؟

من النوع اللى ما يتعرفش الا بعشرة السنين

18 - السفر بالنسبة لك؟

تجديد حياة

18- 19-وقت فراغك بتعمل فيه إيه؟

بقعد على الكمبيوتر او اقعد على الكمبيوتر


20-المود بتاعك ؟

اصفرمخضر كده داخل على ازرق ... مودى هادى مستكين

21-الاكلة المفضلة ؟

محشى كرنب مع الملوخية

22-صفات اللي أخدتها من بابا ؟

حب القراءة وخاصة قراءة الجرنان

23-الصفات التي أخدتها من ماما ؟

التفكير الواقعى

24-اكتر ست حاجات بكرهها؟

الخيانة ..الامر الواقع ..المكر....كفاية كده

25-اكتر ست حاجات بحبها؟

هما لازم ستة يعنى؟

الحنان ..الصدق ..الصراحة ...الوضوح...الوفاء...

26-الشغل بالنسبة لك؟

تنميه للشخصية

27-الانترنت بالنسبه لك؟

زى الشاى فى الامتحانات ..بيفوقنى

اخيرا خلصت ...ده كان بوست سهل خالص ..جاوبتوه فى اسبوع

شكرا يا اهوندا ....


اه صحيح انا همرر التاج ده لروح ..

ايوة روح بالذات ..واللى نفسه يجاوبو يجاوبوه

سلام









8/25/2007

عنيييييييييييييييد

ايوة عنيد ..بعد فترة قليلة من الخطوبة عرفت انه عنيد
صحيح طيب
صحيح انسان عاقل
بس عنيد ..ممكن ما تكونش دى مشكلة مع واحدة رايقة وفايقة وضاربة طناش فى كل حاجة
لكن معايا انا ما ينفعش ..لانى وبلا فخر عنيدة زيه واكتر كمان
بس ما حاولتش ابدا اعانده او اظهرله ده
كل ما كان يعاند فى حاجة اخده بالسياسة كده وبالطيبة ..لغاية ما يهدى ويبطل عند
لكن انه يعاند ويوصل عنده انى يكون سبب فى اهانتى ..ده ما اقبلوش ابدااااااااااااااااااااااااا
ازاى يعنى عايزنى اعتزر او اصالحه فى غلط انا ما عملتوش ..هو اساسا مافيش غلط حصل ولا اى حاجة تستدعى الزعل
كل ما فى الامر انه كان هيجى يخرج معايا وبابا قرر فجاءة اننا نسافر نصيف فى اسكندرية ..طبيعى انى اوافق على كلام بابا ..مهو مصيف بيحصل مرة فى السنة ...وقلت لخطيبى العندى اننا مسافرين ومش هينفع تيجى ودار الحوار الاتى ......
:

هو :مسافرين فجاءة كده؟
انا :ايوة بكرة ان شاء الله الصبح
.........................
انا :ايه مالك ساكت ليه؟
هو :لا ابدا مستغرب بس من السفر المفاجىء ده
انا :مهو احلى حاجة فى السفر انه يحصل فجاءة
هو :ماشى ترجعوا بالسلامة

خلاص كده ...وتانى يوم رنات بقى وعادى خالص ....اتصل....وكان الحوار الاتى :

هو :انتو فين ؟سافرتو ولا لسه؟
انا :احنا فى اسكندرية خلاص
هو:والله طيب كويس
انا :وانت فين؟
هو:انا فى العربية رايح راس البر
انا :ايه ده؟مش قلت انك مش فاضى؟مسافر ليه؟
هو: تغيير جو

برضه خلاص ....واستنيته على رنات انه يطمنى على وصوله ...ضرب طناش ...استنى مافيش فايدة ..اتصلت انا

انا :ايوة انت كويس؟
هو:الحمد لله بس تعبان شوية
انا :خير مالك فى حاجة حصلت ؟
هو :لا ابدا انا كويس بس الطريق تعبنى والعربية معصلجة شوية
انا:
طيب الحمد لله انك بخير


خلاص برضه ...استنيت يطمنى انه وصل ....مافيش حاجة خالص لا رنات ولا ميسدات ولا حتى رسالة

اتصلت تانى ...رد عليا صاحبه !!!!!!!!!!!!!!!!مين ده؟
انا: الو هو خطيبى كويس؟
صاحبه:ايوة كويس الحمد لله
انا :طيب هو ما ردش هو ليه؟فى ايه؟بجد هو كويس؟
صاحبه : ايوة والله كويس بس هو بيتعشى مش هيعرف يكلمك لما يخلص هيبقى يتصل بيكى


من امتى يعنى كان مابيردش عليا وهو بياكل ولا حتى ماشى فى الشارع ولا حتى فى وسط شغله ؟
بهبلى افتكرت انه تعبان بجد ..استنيت مكالمته .....طلع كويس مافهوش حاجة ..بس لانى كنت خايفة عليه نسيت اتخانق معاه انه ازاى مايردش عليا هو

قالى لما اجى لينا كلام مع بعض كتير فى حكاية السفر المفاجىء ده

على اخر اليوم حسيت انه بيعاند فيا وخلاص ...سافرت سافر ...عايزة اطمن عليه ..مايطمنيش الا بمزاجه هو وقت ما هو عايز...... عايز يخلينى اصالحه فى حاجة ما تزعلش....فيزعل ويفضل زعلان وكلامه غلس معايا علشان انا اصالحه
وده مش هيحصل ....هو فاكرنى بقيت مراته ما اتحركش الا باذن منه؟
قلت خلاص ...هو زعلان على حاجة ما يتزعلش منها ...انا بقى هزعل على كل اللى عمله فى اليومين دول بسبب عنده

طولت عليكم ....المشكلة كلها هى العند .....ابتدى حياتى معاه دولقتى على العند ده ..هيكون فى اوله خفيف خفيف ..وبعد شوية المشكلة تزيد
ويا ترى مين فينا اللى هيرخى للتانى علشان الحبل ما يتقطعش؟انا ولا هو؟

اكيد انا ..ما انا طيبة وغلبانة ومكسورة الجناح وقربت كل الابراج اللى فى نافوخى تطير

حاجة تجنن

8/07/2007

.................................

الاول انا اسفة على تاخير الكتابة بس ده لانى ترددت كتيرقبل ما اقرر انى اكتب فى الموضوع ده
واسفة مرة تانية اذا كان الموضوع هيبقى كلامه تقيل حبتين ...بس بجد قبل ما تقروه انا عايزة اقول ان دى رسالة للشباب ...
عايزة اقولهم اتقوا الله فى البنات
هو كل الحكاية انى هتكلم عن التحكمات ..تحكمات الاهل والخطيب وقبل منهم تحكمات كلام الناس وقبل كل ده حدود الدين
ليه ليه ليه؟
ليه كل التحكمات دى ؟كل ده علشان خايفين عليا ؟
مااااااااشى انا موافقة تخافو عليا ..بس ليه انا بس اللى هيبقى اللوم عليا لو خرجت عن الحدود؟
يعنى هو انا مش بنى ادم زى زيه؟اشمعنا انا اللى افضل واعية وصاحية وخايفة على نفسى ..واشمعنا انا اللى يكون فى ايدى رسم حدود العلاقة بينى وبينه؟ ليه هو كمان ما يخادش نصايح ..لييييييييييييه؟
اشمعنا انا اللى اخد كل التحزيرات وانفذ الاوامر اللى انا معترفة انها هتحمينى ..وهو كل اللى بيعمله انه يمثل انه زعلان لو رفضت انى اسلم عليه او رفضت اى تجاوز للعلاقة بينا ؟ايوة يمثل لانى متاكده ان كل راجل فى الدنيا دى عايز خطيبته تكون قطة مغمضة وترفض اى حاجة غلط ..بيمثل والمفروض انى اصدق تمثيله ده واقوله ما تزعلش احنا كده بنعمل الصح
اشمعنا انا اللى اقعد افكر ازاى اتصرف معاه بشياكة علشان ما يزعلش لما اصده؟
اشمعنا انا اللى يجى اللوم عليا ...
ليه هو من الاصل ما يعملش حاجة غلط؟ليه هو ما يحافظش عليا كانى اخته اللى بيخاف عليها؟اشمعنا هو يختبر اخلاقى وتدينى ويضغط عليا ..هو انا مش بشر ؟مش بنى ادم؟
ما حدش يفهم ان سبب غضبى ده ان فيه حاجة حصلت لا سمح الله
بس هى كل الحكاية انى مش فاهمة ليه البنات هى لازم تبقى عنيها فى نص راسها ...ليه الشاب ما يتقيش ربنا كده وما يحاولش حتى يختبر البنت فى اخلاقها لدام متاكد انها انسانة كويسة
بلاش مكر يا شباب
عايزنها قطة مغمضة سبوها قطة مغمضة على طول
حاجة تجنن

7/24/2007

كلمة السر

كلمة السر ...يعنى الباسورد
يعنى الايميل
يعنى الماسنجر
يعنى لا اى اى ولا زى زى
وسمعنى اجدع سلام
وما ترقصنيش يا جدع لانى من عائلة محافظة
....
عرفنا باسوردات بعض ...خلاص ايه يعنى ؟
تفتكروا ممكن يدخل الايميل بتاعى؟
يعنى فيها حركة مراقبة؟
وايه يعنى؟
مش شايفة ان فيها اى حاجة
ياخد الموبايل ويقعد يقلب فيه يمين شمال فوق تحت ...عادى بيعمله تمارين الصباح علشان يفضل نشيط
....
مش مفروض بينا ثقة ؟مش مفروض الصراحة هى اساس تعاملنا مع بعض
؟
عادى ..انا بالنسبة ليا عادى ...ماعنديش حاجة اخبيها عليه
ما عدا المدونة دى ...لانه لو عرف مش هعرف اكتب فيها بحريتى ...لان انا لسه يا دوبك بفهمه
ولا اقوله ؟اقوله على المدونة بالمرة ؟....لا مش هقوله عليها ...انا بكتب علشان اعرف اتعامل معاه يعنى فى مصلحته مش حاجة هتضره
ولو عرف....هيعمل ايه؟هيكون رد فعله ايه؟
مش عارفة
مش معقول كده ...انا مش صغيرة علشان يعاملنى على انى طفلة ....امال فين الثقة بقى؟
هو بخرج ويروح شغله ومع صحابه واكيد بيجيب سيرتى فى كلامه معاهم
انا بقى لا بخرج ولا باروح لصحابى ...فيها ايه؟

وكمان لما نويت افضفض خليتها فضفضة علنى ...يعنى ما بخبيش ولا حاجة ولا ايه رايكم؟
حاجة تجنن

7/18/2007

ابدأ من امتى؟

مش عارفة ومش فاكرة امتى الراجل ده بدا يجننى...بس تقريبا من بعد الخطوبة على طول
اعملى واعملى وسوى ..ومش سايبنى انااقوله اعمل اى حاجة خالص ...وانا طبعا قطة صغيرة مش عارفة اقوله ما تعملش كده ولا اعمل كده ...تحكمات غريبة خلتنى اقول ايه اللى عملته فى نفسى ده؟...انا كان مالى ومال الخطوبة والجواز ووجع القلب ده؟!!!!!!!!!!!!!!!
حسيت وقتها بخنقة رهيبة وماكنتش عايزة اكلمه ..واللى زاد وغطى نظام الرنات ده...انا ارنله ليه؟مش لسه متكلمين ؟خلاص ..ولو ما رنتش يبقى مش مهتمية بيه ...ولو رنيت كتير يبقى مش بخليه يركز فى شغله ولا عارف ينام....يعنى انا لما هفضل ارن هعرف اركز انا ولا هعرف انام؟!!!!
حاجة تجنن ... ...

7/17/2007

صباحه عسل

كل يوم ...صباحه عسل ...لما لزقت
انا عارفة هاخد وقت على ما تعرفونى وتعرفوا مدونتى ...بس انا متفائلة ..وعارفة ان فى كتيييير غيرى عايزين يقولوا اللى هقوله ...انا عاملة المدونة دى ونفسى افهم خطيبى من خلالها ..ادعولى افهمه