11/05/2008

الكدب مالوش رجلين

الباشا تلميذ ...تلميذ فى مدرسة الكدب
ميت مرة اقوله انا بحب الصراحة ما بحبش الكدب
الاحسن انك تقولى الصراحة وما تخبيش عليا حاجة
لانى هعرف هعرف
الكدب مالوش رجلين

ويسمع من هنا ويطنش تطنييييييييييييييش

ويخبى ويعمل اللى فى مزاجه ...ويكدب
لكن على مييييييييييييييين عرفت طبعا كل حاجة

المشكلة مش فى انه يكدب لانى عارفة ان الكدب ده شىء طبيعى بيجرى فى دمهم

لكن المشكلة هى ان الكدب وانه يعمل الحاجة ويخبى عليا معناه انه ما بيحترمنيش ولا بيحترم رايى نهااااائى


لذلك قررت انى اتصرف معاه بالطريقة اللى تريحنى انا وتفقع مرارته هو
مش عايز تقولى حاجة يا حبيبى ؟
متاكد ؟
ماشى براحتك ....وبعد كده يكتشف انى عرفت وانى اتصرفت باللى يريحنى انا ويبقى يورينى شطارته لو عرف ياخد منى حق ولا باطل
والله يرحم لسه بعقلى الطيبة الحنينة
معلش الدنيا دى بتعلم

بتاسف ع تغيير اسلوبى فى الكتابة لكن نفسيتى فى البدروووووم



7/07/2008

انا خلاص اتجننت

يعنى هو علشان خلاص بقى خد عليا وبناكل ونشرب سوا ونروح ونيجى يبقى هيمشى كلامه عليا يعنى؟

اقوله بلاش ما ينفعش يزعل ويوقلى خلاص ماشى مش هعمل كده وبعدين الاقيه يعمل الحاجة من غير ما يقولى

اقوله انا مش مرتاحة للموضوع الفلانى وشايفة اننا نعمل كده احسن يقولى خلاص اللى يريحك وبعد شوية يتصل بيا يقولى مش هينفع نعمل اللى بتقولى عليه علشان كذا وكذا وكذا ويكركب الدنيا فوق دماغى ويخلينى اقوله فى الاخر طيب اعمل اللى يرحيك

عارفين لولا انى متاكده انه بيعمل الحاجة كويسة كنت زمانى خدت موقف من زمان بس علشان بلاقيه بيقرر وتطلع الحاجة كويسة بقول خلاص اعمل مشكلة ليه

مع انه مش على طول كده ،يعنى ساعات يبقى عندى مشوار ولا رايحة فى اى مكان ومش فاضية والاقيه يتصل بيا ويقولى انا جاى النهاردة
،تيجى فين يا راجل انت هو انا فاضيالك (ده طبعا كلام بقولوا لروحى )طيب ما تخليها كمان يومين ولا حاجة ولا اقولك خليها بكرة
ليه يعنى ؟(بدا يتحول )
اصل ورايا مشوار النهاردة بس عايزة اروحه وهستناك بكرة
طيب خلاص وفيها ايه هاجى معاكى
لا حول ولا قوة الا بالله هو اللى فى دماغك فى دماغك !!!!!!!(طبعا ده كلامى لنفسى )طيب ما انا بقولك خليها بكرة احسن علشان مش هينفع تيجى معايا المشوار ده
لا خلاص لا النهاردة ولا بكرة ولا بعد اسبوع سلام عليكم
طيب استنى بس والله انا عايزاك تيجى بس مشغولة ومش هعرف اقعد معاك
ماشى خلاص هو انا قلتلك حاجة سلام عليكم

وبعد ساعة كده ولا حاجة وقبل ما انزل اروح مشوارى الاقيه بيخبط على الباب
ويضيع المشوار

ابقى خلاص هتجنن واغلى من جوايا ،وبابا يقولى مايصحش يا بنتى يعنى هو جاى لمين جايلى انا نقرا الجرنان سوا ابقى اعملى مشوارك بكرة

فى مرة صممت انى لازم اخد موقف من الى بيحصل ده ودار هذا الحوار :

انا مش قلتلك ما تعملش اللى عملته ده (وبينتله العين الحمرا ) ؟
ايوة قلتيلى بس انا كنت عارف انك فى لاخر هتقتنعى بكلامى
بس انا مش مقتنعة برضه
ليه بس مش كده احسن وبعدين ايه الفرق يعنى مش كتير
بس انا كنت عايزاك تعمل اللى قلتلك عليه
يا ستى الجايات اكتر من الرايحات المرة الجاية اعملى اللى انتى عايزاه وانا مش هتدخل خالص

شوفوا بقى المرة اللى بعدها

ياراجل حرام عليك ،بقى انا قلتلك تعمل اللى عملته ده ؟انا مش قايلالك تعالى بكرة ونروح سوا ؟
يعنى انتى ماكنتيش عايزة تشوفينى النهاردة ؟اجى بكرة تانى يا ستى
لا طبعا عايزة اشوفك وكل حاجة بس انت كده خليت بابا ما يرحش يزور صاحبه فى المستشفى علشان يقعد معانا
معلش انا هتصرف مع بابا
والله لولا انه قالى خلاص خليه يجى انا عايز اشوفه كان زمانى قلتلك لا ما تجيش
يعنى انتى اللى خلاكى تقوليلى تعالى علشان بابا ما يزعلش بس ؟طيب حقك عليا انا قايم ماشى
(وما بيقمش بقى حركات وبس )
لالالالالا مش قصدى طبعا

واقعد انا اللى اصالح فيه
اعمل ايه معاه الراجل ده ؟طبعا هو برضه مش على طول كده ومش فى كل حاجة ،بس لما بيبقى مقتنع بالحاجة يبقى خلاص موت يا حمار انه يغير رايه

اتخانق انا بقى معاه ولا اعمل ايه ؟

حاجة تجنن











7/02/2008

احكيلكم الحكاية ؟

مساء السكر
او مساكم سكر زيادة
--------------------
طلبتوا منى انى احكى الحكاية واطمنكم وبصراحة قو ...ببركة ربنا ثم بدعاكم ربنا فرجها الحمد لله
سهلها ازاى بقى ؟

الحمد لله قبل ما الشهر يخلص بيوم كانت المشكلة اتحلت الحمد لله وبجد بشكركم جدا لانكم دعتولى وحسيت فعلا بخوفكم عليا واهتمامكم

مش هعرف احكيلكم بالتفصيل لكن اقدر اقولكم ان الايمان بالله واليقين وحسن الظن بالله هو ده المفتاح السرى والمصباح السحرى لاى ازمة بيكون الانسان فيها

الراجل اللى هيجننى حاول يعمل كل اللى عليه واهو ربنا يقويه بقى ،هو يعنى هياتجوز اى واحدة ولا هيتجوز كام مرة فى حياته يعنى

اسعى يا عبد وانا اسعى معاك،الحمد لله ،ماينفعش الدعاء من غير سعى ،واخذ بالاسباب ،خدنا بكل الاسباب الممكنة علشان تتحل ازمتنا الاقتصادية وكان دافعنا الوحيد اننا ما نزعلش حد منا ولا ندى فرصة للشيطان انه يدخل بينا ولا انه يعكر صفو القوات ،ولا نيران صديقة ولا عدوة الحمد لله

بجد مبسوطة قوىانكم كنتم معايا ،الحمد لله وقريب قوى هكتب بوست جديد عن الراجل اللى هيجننى



6/01/2008

ادعولى

انا مش جاية اشتكى المرة دى من خطيبى

ولا جاية احكى حاجة

انا جاية بس اقولكم ادعولى ...وخصوصا حبيبتى روح
ادعيلى قوى

الشهر ده اللى هو بدايته النهاردة هيفرق معايا قوى ...كل يوم هيعدى فيه يا اما هينقص من عمرى يا هيزوده ،ومش هعرف غير فى اخر الشهر ده

مش عايزاكم تتخضوا ،الموضوع مش موضوع صحة ولا مرض الحمد لله
الموضوع مادى ومالى جدا ...زى اى حاجة بقت فى دنيتنا دى ،كل حاجة بقت ماشية بالفلوس

ادعولى ...انا حاسة انى فى كرب عظيم مش هيخرجنى منه غير ربنا سبحانه وتعالى ...لانى مش لاقية حل ولا مخرج اقدر اعمله

ادعولى ...هو يمكن ابتلاء من ربنا لينا ...ادعولى اثبت فيه

مش عايزة غير دعاكم بس وياريت توصوا كل الناس تدعيلى ...الشهر ده بس يا جماعة ...ال30 يوم دول بس

شكرا ...واسفة مش هقدر ارد على تعليقاتكم لا فى البوست ده ولا اللى قبل منه لكن هتابعكم من وقت للتانى

شكرا

5/20/2008

تاج والامر لله

لوأعطيتك ثلاث وردات .. من هم الثلاث الأشخاص اللى هتهديهم الورد اللى معاك ؟؟

هديهم لحبايبى ،بابا وماما وخطيبى

لو أعطيتك ورقة بيها 3 سطور فقط و قلت لك أكتب فيهم اللى أنت عيزه هتكتب إيه ؟؟

الحمد لله انا احسن من غيرى كتير،اتمنى استقر فى حياتى مع الراجل اللى قرب يجننى ،وربنا يقدرنى واكون بيت كويس

هما لازم تلات سطور؟

ما هو هدفك فى الحياة ؟؟

انى اعيش فى استقرار ،واعمل كل اللى يخلينى اقدر احقق الاستقرار ده .

إن شاء الله بكرة هيكون أحسن من النهارده" ِهل تصدق هذه المقولة ؟؟ و لماذا ؟؟

الحمد لله ،ما ضاقت الا اما فرجت ،اكيد اؤمن بيه

أجمل مقولة سمعتيها فى حياتك ؟؟

مش عارفة مش فاكرة حاجة معينة ،بس كلمة انى احبك فى الله بتخلينى مرتاحة قوى

من المغنى اللى بتحبه أوى و إيه أحلى أغنية ليه بتحبها ؟؟

طيب ليه كده الاحراج ده؟انا بحب القديم يعنى ام كلثوم ،عبد الحليم ،بس دلوقتى بحاول ما اسمعش اغانى خالص

لكن لو حبيت اسمع هسمع لام كلثوم ،اغنية ايه ؟اغنية ايه ؟

ممكن :سيرة الحب

غزة" تمثل لك إيه فى حياتك ؟؟"

تمثل ليا مأساة

أعطى لإنتمائك لوطنك درجة من مائة ؟؟

99.9 %

لو تزوجتى و أنجبتى بنتين و ولدين أى الأسماء تختار لهم ؟؟

اربعة بحالهم ؟ هو احنا قادرين فتح بيت لاتنين بس حتى

عموما هسميهم :جنا ،هنا ،محمود ،حسين

وممكن اغير رايى فى اى وقت ...بس ربنا يسهل وييجوا

عمرك غشيت فى أمتحان و انت صغير ؟؟

والله جربت فى امتحان واحد ،وفشلت الحمد لله ...ما بحبش اغش ،لانى فى الاخر هغش نفسى بالنتيجة

اجيب درجتى بشرف احسن

لو أتعرض عليك رشوة كبيرة و انت فى زنقة ماليه هتعمل إيه ؟؟

هقول يارب ياخد كل حرامى ومرتشى ،ربنا هيفرجها اكيد بعديها

وهقول دعاء قضاء الدين :اللهم انى اعوذ بك من غلبة الدين وقهر الرجال

قول 3 صفات ب 3 كلمات بس توصف بيهم شخصيتك (يعني كريم طيب خدوم كده )0

عاقلة ،رومانسية ،كتومة الى حد ما

اول مرتب ليك وكان كبير قوي يكفي تجيب اغلى هدايا هاتجيب لكل فرد في عيلتك ايه

هجيب لبابا قلم حبر

وماما خاتم دهب

وخطيبى هجيبله ...مش عارفة ...خليها مفاجأة J

برضه بكلمة واحدة ايه اهم صفة عايزها في شريك حياتك

الصراحة والوضوح

بكره حاجة اسمها المكر

ايه المجال اللى غير دراستك وشايف نفسك فيه قوي حتى لو كان ياشيخ الرسم عالحيطة

كان نفسى اكون مصممة ازياء او خبيرة تجميل

بتحب السفر؟

ومين ما بيحبوش ،تجديد حياة ووشوش وتجارب

طب دلوقتى حالا ايه المكان اللى نفسك تكون فيه

نفسى اكون على شط النيل بليل على باخرة والهوا حواليا من كل مكان وبسمع موسيقا هادية

تمرر التاج ده لمين ؟؟

كل اللى عايز يجاوبه يجاوبه ...طبعا اولهم روح

5/07/2008

كان بيحبها ....انا حظى حلو


كان بيحبها ...بيحلم باليوم اللى هيرتبط بيها ...عرفوا بعض لفترة طويلة وفجاة الحلم اتهد ...

كان بيحبها ...بس قرر يكمل حياته من غيرها ...نسيها او يمكن حاول ينساها ...
واتعرف على بنت جديدة ...يمكن بتشبها فى حاجات كتير ...لكن مش هى ...
اعجب بيها واتقدملها ...حبها وحبته ...لكن لسه فى قلبه مكان لحبه القديم ...

لسه فاكرها ...لكن بيحب خطيبته حب كبييييييير قوى ...لسه حاسس ان قلبه مجروح ...لسه بيغنى اغانى حزينة ...لسه بيسرح وبيفكر فيها ...بس مش لانه لسه بيحبها ..لكن الجرح لسه جواه

بيتحول فجاة لانسان صارم ...يتوعد ويهدد لو فكرت خطيبته تزعله او تازيه او تجرحه
فجاة يتحول لطفل صغير ...يخاف ويحس انه من غير امه ...يخاف من بكرة ..

لسه فاكر جرحها ليه ...مش طالب غير حب وحنان وصدق مشاعر ...

مش عايز غير انى احبه وافهمه واراعيه ...
تفتكروا بعد كل ده اقدر اتخلى عنه ؟
تفتكروا قلب لسه مجروح من حب قديم ...اجرحه والومه على انه لسه مجروح وانه لسه فاكرها ؟

ما قدرتش اواجهه بانى عارفة كل حاجة ...خفت عليه ...خفت يزعل منى ويفتكر انى مش مقدرة حبه ليا ...
خفت اخنقه بغيرتى واضغط عليه ...
خفت اعمل كده افكره بيها اكتر ....
قررت انى لازم افضل معاه
..مش هسيب جرح فى قلبه يفرق بيننا ولا قصة قديمة تقتل حبه الجديد ...تقتل فرحتى بيه وخوفه عليا ...

التجربة الاولى دايما بتعلم الانسان ...بتقوى قلبه ..بتخليه يتمسك اكتر بنجاح التجربة التانية ....

انا محظوظة ...الحمد لله ...رغم شوية الدموع اللى فى عنيا اللى حاولت اداريها عنه ...لكن بحمد ربنا انه معايا انا ...
الحمد لله


4/21/2008

مفقوعة على الاخر

تصورت لفترة انى هقدر خلاص اتعايش مع الراجل ده
تصورت انى هقدر اكمل من غير اى اسشارات فنية منكم
وافتكرت انى خلاص فهمته

لكن جيت على الاخر وهنجت ...تقريبا كل يوم ببقى اهبل من الاول ...وشعرى بيتنحكش اكتر من الاول ...وبحول ودماغى بتضرب

الغريبة انه بيحبنى ...والاغرب انى بحبه ...والاكثر غرابة اننا بنحب بعض

ايوة راجعة مفقوعة على الاخر ...
حاسة انى هبلاااااااااااااااااااا ...ومش فاهمة حاجة ....متنحة من الاخر ....

مش عارفة ايه اللى انا مش فاهماه فيه ...ولا انا اللى بقيت اقفله على الواحدة ؟
ولا يمكن توتر المزاكرة والامتحانات مخلينى طايحة فى الكل ؟

اكتشفت معاه انى انسانة حساسة قوى ...بزعل من اى كلمة بتتقال بقصد او من غير قصد
واكتشفت انى بحبه قوى ...بعد ما كنت فاكرة نفسى يا اما هنا يا اما هناك وان ما حدش يقدر يخلينى اتعلق بيه قوى كده

اكتشفت انى بغير عليه جداااااااااا...لدرجة مخيفة ...بخاف من نفسى ..لان بحس جوايا قوة مدمرة ممكن تنفجر وتشوووووووووط اللى قدامها لما بكون غيرانه عليه

اكتشفت كمان ...انه كباقى الرجالة اللى فى العالم ...بيكدب علشان يبرر مواقفه ...حاجة مؤسفة لكن كنت متوقعاها ...

اكتشفت انى ممكن اعاتب فيه كل يوم تقريبا بس بكبر دماغى ...ياترى هو كمان بيكبر دماغه ؟

بدانا نزهق من رتم الحياة العادية دى ...بيجيلى ونتكلم او نخرج ونتكلم فى دراستى وشغله واهله واهلى ..وهنعمل ايه وفاضل ايه ولسه قدامنا قد ايه ...شوية كلام رومانسى ...وبعدين خلاص ...مع السلامة ...عليكم السلام

وبعدين ؟مش عارفة ...لكن فعلا كل ما فترة الخطوبة تزيد كل ما العلاقة بين الطرفين بتاخد طريق مش حلو ..مش مفيد ...ودماغكم ما تروحش لبعيد ...مش التطور الطبيعى للحاجة الساقعة ..لا ...لكن بتبدا العلاقة بينهم تبقى مالهاش طعم ...بيقربوا يكونوا اخوات وصحاب من كتر الالتزام ...فعلا والله قربنا نكون اخوات وبنضرب بعض كمان وفاضل نتخانق ونشد شعر بعض

بقولكم ايه ....ادعولى ..بدل ما هتجنن عليه ...لانى فاضلى شعرة فعلا

حاجة تجنن



1/27/2008

ومن الحب ما خنق





من الحب ما خنق
فيها ايه انى احبه؟
حرام؟عيب؟لا يجوز؟
انا بحبه ايوة
وهو كمان بيحبنى
بس طبع الرجالة اللى مش هيغيروه ابدا ان البنت لما تحبهم يفتكروا انهم ملكوها او انهم ليهم حق عليها
يعنى اعترافى بحبى ليه خلاه يتغير شوية
خلاه يحس انه ملكنى وزادت ثقته فى نفسه اكتر من الاول
والى جانب انه عنيد ..
،افتكر علشان بحبه يبقى هسمع الكلام




يعنى كان الافضل انى ما احبوش ؟
ولا الافضل انى ما كنتش اعترف بحبه ؟؟
ولا الافضل انى ابينله من وقت للتانى انه ممكن يخسرنى وانى ممكن ابيعه لو غلط فيا ؟
انا ما بحبش اسلوب التهديد ده وما بعرفش امثل دور انى زعلانة

هو انا يمكن مكبرة الموضوع شوية ...
بس اهلى بيقولولى
خلاص ده لف دماغك وبيضحك عليكى وما بقتيش عايشة غير ليه
انا حتى مش عارفة لو اهلى مش معايا ...كنت هتعامل معاه ازاى
فى حاجات انا ما ببقاش واخدة بالى منها ..هما بيقولولى عليها ...زى ما بيقولوا مراية الحب عامية
انا ما كنتش كده ..وكنت بقول انى هفضل صاحية وفايقة لكل حاجة بيعملها ..بس كل زيارة يجى فيها، اهلى يقولولى شايفة بيعمل ايه ؟شايفة بيقول ايه؟شايف بيستهبل ازاى ؟

ازاى اخليه كويس مع اهلى ؟وما يفتكرش انه ملكنى خلاص وانه لازم يحترم اهلى وانه فى بيتهم ؟
....طيب ما انا كويسة مع اهله من غير ما يقولى حاجة
بس يمكن علشان ماما وبابا عارفين وبيقولولى اعمل ايه علشان اكسب اهله وخاصة حمااااااااتى




بس خلاص
حاجة تجنن