1/27/2008

ومن الحب ما خنق





من الحب ما خنق
فيها ايه انى احبه؟
حرام؟عيب؟لا يجوز؟
انا بحبه ايوة
وهو كمان بيحبنى
بس طبع الرجالة اللى مش هيغيروه ابدا ان البنت لما تحبهم يفتكروا انهم ملكوها او انهم ليهم حق عليها
يعنى اعترافى بحبى ليه خلاه يتغير شوية
خلاه يحس انه ملكنى وزادت ثقته فى نفسه اكتر من الاول
والى جانب انه عنيد ..
،افتكر علشان بحبه يبقى هسمع الكلام




يعنى كان الافضل انى ما احبوش ؟
ولا الافضل انى ما كنتش اعترف بحبه ؟؟
ولا الافضل انى ابينله من وقت للتانى انه ممكن يخسرنى وانى ممكن ابيعه لو غلط فيا ؟
انا ما بحبش اسلوب التهديد ده وما بعرفش امثل دور انى زعلانة

هو انا يمكن مكبرة الموضوع شوية ...
بس اهلى بيقولولى
خلاص ده لف دماغك وبيضحك عليكى وما بقتيش عايشة غير ليه
انا حتى مش عارفة لو اهلى مش معايا ...كنت هتعامل معاه ازاى
فى حاجات انا ما ببقاش واخدة بالى منها ..هما بيقولولى عليها ...زى ما بيقولوا مراية الحب عامية
انا ما كنتش كده ..وكنت بقول انى هفضل صاحية وفايقة لكل حاجة بيعملها ..بس كل زيارة يجى فيها، اهلى يقولولى شايفة بيعمل ايه ؟شايفة بيقول ايه؟شايف بيستهبل ازاى ؟

ازاى اخليه كويس مع اهلى ؟وما يفتكرش انه ملكنى خلاص وانه لازم يحترم اهلى وانه فى بيتهم ؟
....طيب ما انا كويسة مع اهله من غير ما يقولى حاجة
بس يمكن علشان ماما وبابا عارفين وبيقولولى اعمل ايه علشان اكسب اهله وخاصة حمااااااااتى




بس خلاص
حاجة تجنن

هناك 3 تعليقات:

kafrawy يقول...

بعد السلام

اقوللك ع حاجة كويسة

استحالة بل ومن رابع المستحيلات

انك ترضى كل الاطراف

حاولى تقنع كل طرف بالاسلوب اللى هو يفهمة _خاطب الناس على قدر عقولهم _

مش اللى انتى فاهمة

أميرة ويلز يقول...

يعنى هما اهلك بيتبلوا عليه ؟؟

والا هو بيتصرف طبيعى ومش بياخد باله من كل حاجة
وانتوا بتقفوله على الواحدة والا هو بيبقى قاصد يتصرف كدة
وبعدين ايه موضوع التملك دة بالظبط
دى فترة خطوبة يعنى فترة تدريب بيشوف انتى تقدرى تتحملى طبعه هتبقى مطيعة كدة زى ماهو عايز والا لا
واحد بيتملك فى فترة الخطوبة هيعمل ايه بعد الجواز ؟؟ وبعدين النوع دة من الرجالة ماينفعش معاه تهديد لانك لو بتهددى دلوقتى هيجى وقت تبقى فى بيته وعصمته وتضطرى مرغمه تيجى على نفسك كتيييييييير عشان المركب تمشى
دة مجرد تصور عام بما ان كلامك عاممافيهوش تفاصيل
تحياتى

ro7 يقول...

لسة بعقلي حبيبة قلبي
بصي زي ما انتي قولتي الرجالة
كلها طبع واحد
وللاسف لما بيحسوا انهم ملكونا
بيتغيروا وبيتعاملوا بتهاون مع
حاجات كتير بس حاسبي
اه مطلوب منك طبعا تحبية وتحبية جدا
بس عند الغلط توقفية عند حده
وتحطية في نفس موقفك
يعني لو قال كلمة مش لطيفة لباباكي او مامتك تقوليلة لا حاسب
انا بعامل اهلك باحترام وبقدرهم وبحترمهم وكلمتين حلوين في النص
كفاية انهم السبب في وجودك ليا
لكن انك تتعدي علي حد من اهلي لا
وحسسية انك قريبة منة
في اللحظة دي
قوليلة انا وانت هنحل خلافاتنا مع بعض
لان المركب لازم تمشي ودة طبعا بحكم نضج التفكير مش بحكم انة ضعف مني ولا منك
لكن اي طرف تالت علينا نحترمة ونقدره
وياريت ماتقوليش كلمة بحبك كتير
وياريت بردوا لما تلاقية وثق في نفسة اوي يعني حاولي تبقي باردة معاه
يعني لو متعودة ترني عليه طنشية
متعودة تمسجي قللي المسجات
هتلاقية اتعدل معاكي شوية
دة لمصلحتك عشان تحسي بحبة دايما
لكن انك تقولي مبحبش التمثيل
هو مش تمثيل
هي شدة ودن من حين لاخر في مصلحة الطرفين
وبتبقي في حاجات بسيطة بس هو هيلتمسها
وهيحس بيها