٧/٠٧/٢٠٠٨

انا خلاص اتجننت

يعنى هو علشان خلاص بقى خد عليا وبناكل ونشرب سوا ونروح ونيجى يبقى هيمشى كلامه عليا يعنى؟

اقوله بلاش ما ينفعش يزعل ويوقلى خلاص ماشى مش هعمل كده وبعدين الاقيه يعمل الحاجة من غير ما يقولى

اقوله انا مش مرتاحة للموضوع الفلانى وشايفة اننا نعمل كده احسن يقولى خلاص اللى يريحك وبعد شوية يتصل بيا يقولى مش هينفع نعمل اللى بتقولى عليه علشان كذا وكذا وكذا ويكركب الدنيا فوق دماغى ويخلينى اقوله فى الاخر طيب اعمل اللى يرحيك

عارفين لولا انى متاكده انه بيعمل الحاجة كويسة كنت زمانى خدت موقف من زمان بس علشان بلاقيه بيقرر وتطلع الحاجة كويسة بقول خلاص اعمل مشكلة ليه

مع انه مش على طول كده ،يعنى ساعات يبقى عندى مشوار ولا رايحة فى اى مكان ومش فاضية والاقيه يتصل بيا ويقولى انا جاى النهاردة
،تيجى فين يا راجل انت هو انا فاضيالك (ده طبعا كلام بقولوا لروحى )طيب ما تخليها كمان يومين ولا حاجة ولا اقولك خليها بكرة
ليه يعنى ؟(بدا يتحول )
اصل ورايا مشوار النهاردة بس عايزة اروحه وهستناك بكرة
طيب خلاص وفيها ايه هاجى معاكى
لا حول ولا قوة الا بالله هو اللى فى دماغك فى دماغك !!!!!!!(طبعا ده كلامى لنفسى )طيب ما انا بقولك خليها بكرة احسن علشان مش هينفع تيجى معايا المشوار ده
لا خلاص لا النهاردة ولا بكرة ولا بعد اسبوع سلام عليكم
طيب استنى بس والله انا عايزاك تيجى بس مشغولة ومش هعرف اقعد معاك
ماشى خلاص هو انا قلتلك حاجة سلام عليكم

وبعد ساعة كده ولا حاجة وقبل ما انزل اروح مشوارى الاقيه بيخبط على الباب
ويضيع المشوار

ابقى خلاص هتجنن واغلى من جوايا ،وبابا يقولى مايصحش يا بنتى يعنى هو جاى لمين جايلى انا نقرا الجرنان سوا ابقى اعملى مشوارك بكرة

فى مرة صممت انى لازم اخد موقف من الى بيحصل ده ودار هذا الحوار :

انا مش قلتلك ما تعملش اللى عملته ده (وبينتله العين الحمرا ) ؟
ايوة قلتيلى بس انا كنت عارف انك فى لاخر هتقتنعى بكلامى
بس انا مش مقتنعة برضه
ليه بس مش كده احسن وبعدين ايه الفرق يعنى مش كتير
بس انا كنت عايزاك تعمل اللى قلتلك عليه
يا ستى الجايات اكتر من الرايحات المرة الجاية اعملى اللى انتى عايزاه وانا مش هتدخل خالص

شوفوا بقى المرة اللى بعدها

ياراجل حرام عليك ،بقى انا قلتلك تعمل اللى عملته ده ؟انا مش قايلالك تعالى بكرة ونروح سوا ؟
يعنى انتى ماكنتيش عايزة تشوفينى النهاردة ؟اجى بكرة تانى يا ستى
لا طبعا عايزة اشوفك وكل حاجة بس انت كده خليت بابا ما يرحش يزور صاحبه فى المستشفى علشان يقعد معانا
معلش انا هتصرف مع بابا
والله لولا انه قالى خلاص خليه يجى انا عايز اشوفه كان زمانى قلتلك لا ما تجيش
يعنى انتى اللى خلاكى تقوليلى تعالى علشان بابا ما يزعلش بس ؟طيب حقك عليا انا قايم ماشى
(وما بيقمش بقى حركات وبس )
لالالالالا مش قصدى طبعا

واقعد انا اللى اصالح فيه
اعمل ايه معاه الراجل ده ؟طبعا هو برضه مش على طول كده ومش فى كل حاجة ،بس لما بيبقى مقتنع بالحاجة يبقى خلاص موت يا حمار انه يغير رايه

اتخانق انا بقى معاه ولا اعمل ايه ؟

حاجة تجنن











هناك ١٧ تعليقًا:

روح يقول...

مش عارفة بقي تعملي اية حاجة تجنن فعلا
سايسية وناقشية بالعقل
قوليلة ما تلغيش وجودي ولازم تعملي اعتبار قوليلة الرسول علية
الصلاة والسلام اخد برأي السيدة ام سلمة يعني كان بيعمل لزوجاته اعتبار
والامر شوري او علي الاقل
عايز تعمل اللي في دماغي خدني علي اد
عقلي واقنعني مش اتفاجا انك بتنيمني
وبعدها تعمل الحاجة بردوا
مش عارفة يمكن يجي بالاسلوب دة
وحمد الله علي سلامتك

lonely يقول...

تعرفى انا مش شايفه انها مشكلة قد ما انا شايفه انه زى ما يكون بيتدلع عليكى او بيغيظك

وطبيعى صعب الراجل يتنازل عن قراره وعن اللى فى دماغه بسهوله
ربنا يوفقكم يارب

المـــفـــــــقــــــــوعـــــة مــرارتـهــا يقول...

هما الرجالة كلهم كدة ياأوختي
اللي في دماغهم هو اللي في دماغهم
ماتحاوليش تغيريه
هاتتعبي
انا جوزي بقي اقوله مش باحب آكل حاجة معينة
الاقيه ماتعرفيش ازاي سمعها باحب اكل الحاجة دي
تقريبا مابيسمعنيش بيبقي بيسمع نفسه ساعتها
النصيبة السودة انه اللي بيعمل شوبينج ويشتري حاجات البيت
وطبعا مش بعيد عليه ابدا انه يسالني عاوزة زيت
اقول له لأة
ابص الاقيه جايب الزيت من نفسه اصل بيكون ياحرام جاله هاتف في المنام بيقول له الست دي كذابة انت لازم تشتري الزيت
فتلاقيني عشان جدة شعري وقع من كتر ماشديته من عمايل جوزي معايا

الضاحكون يقول...

انتي بتحكي عن إيه يا ماما
دول كلهم...سايقين الهبل على الشيطنة
دول يفرسوا و يفقعوا و يجننوا..و ينئطوا
ده احنا لينا الجنه

انت تسال والكمبيوتر يجيب يقول...

الأخت العزيزه فرنسا
تحيه طيبه وشكرا على كلمتك الرقيقه ...طبعا رقيقه يارايق ...ونتمنى ان نرى كل الأحبه زوار هذه المدونه المبهجه عندنا فى مدونة البرنامج ليجيبوا على ما نطرحه من اسئله او يروون لنا عن الأنترنت فى حياتهم ...لتذيع حكاياتهم واحاباتهم...نرجوا ان نراكم جميعا فى مدونتنا مع حبيب الملايين -ملايين البشر وليس الجنيهات-عبده الرايق ...وكدونتنا عنوانها سهل وطبعا اللى يسأل مايتهوش وطبعا الرايق مألقوش ان فيه اوتوبيسات مكيفه من جميع المحافظات للمدونه وعنوانها هو
http://netonradio.blogspot.com

Mona Shereif يقول...

مش عارفه ابدأ بايه بصراحه
بس انا هحكى كل اللى جوايا
وابقى رتبى الافكار براحتك وعلى مزاجك

اولا اللى خلانى اعرف مدونتك انى عملت بحث فى جوجل على ازاى اكسب خطيبى ومدونتك كانت فى النتائج

تقريبا كل اللى مريتى بيه انا عايشاه
وبجد انا قابلت حاجات كتير اوى كنت بنهار بسببها
وبجد نفسى افهم هو بيفكر ازاى عايزه افهمه

بس لما بيبعد عنى ببقى هتجنن عليه
صدق اللى قال " ابعد حبه تزيد محبه "
مش هقولك تقريبا كل ما بيجى عندنا بتحصل مشاكل
جايز اكون انا اللى حساسه زياده عن اللزوم وباخد كل كلمة على اعصابى
مش عارفه
بس هو ظروفه بتخليه يسافر كتير وبيبعد بالشهور
بتمنى ساعتها بس المحه من بعيد مش مهم اكلمه ولا هو ياخد باله منى اصلا بس كل اللى محتجاه المحه

مش هنكر انى بحس بحقد وحسد ناس حواليا لمجرد انى اتخطبت بس
او جايز انا بعلق اللى بحصل ده على الحسد
برضه مش عارفه

كنت فاكره انى خلاص قلبى هيرتاح لمجرد انى خلاص لقيت تؤام روحى بل بالعكس لقيت المشاكل بتكتر جداااااااااااا

مقدرش انكر انه مجرد وجوده فى حياتى مريحنى اد ايه بس برضه تاعبنى

بحمد ربنا انه رزقنى بأغلى محمد فى الدنيا
الحمد لله انى حبيته كده

ويارب اجعلنا لهم كما يحبوا واجعلهم لنا كم نحب

اللهم استر عنه عيوبى واستر عنى عيوبه ورضنى بما قسمته لى يارب العالمين
ادعى الدعاء ده جميل اوى

ربنا يوفقك يا قمر الى ما يحبه ويرضاه
سعيدة انى لقيت ليا اخت فى الكفاح

smaka يقول...

انا كمان قربت اتجنن خلاص وعايزه حد يقولي اعمل ايه
انا اتخطبت من 4 شهور كنت بحسب خلاص اني هارتاح لكن لاقيت العكس انا هاتجنن علي ايده
بصراحه هو انسان كويس جدا جدا وفي كل حاجه اي بنت تتمناه لكن علي قد ما هو كويس علي قد ما فيه النقيض من كل حاجه
يعني هو طيب اوي وحنين اوي وبرضه قاسي اوي اوي
المشكله انه مسافر ومش هايجي قبل سنه بحكم شغله واي مشكله تحصل لازم انا الي استحمل عشان هو في غربه
واذا اخدت اي رد فعل بتكبر المشكله يعني غصب عني بضطر اسكت حاولت اتكلم معاه كتير وافهمه ردوده دايما قليله جدا غالبا بتكون ربنا يسهل
بيتعامل كانه سي السيد هو الي بيملي شروطه وانا عليا اني استحمل
انا مش عارفه اعمل ايه خلاص انا قربت منه وهو فيه حاجات كتير اوي كويسه
ساعدوني يا خوااااااااااااااااااتي عشان انا بجد هاتجنن خلاص
ردوا عليااااااااااا
اعمل ايه معااااااه

حاسوباتيه يقول...

ههههههههههههههههه عارفه انا لسه مخطوبه بقالي شهر بس كنت بتابع مدونتك وجت فتره بس وقفت عن النت لانه كان فاصل وفي الفتره دي اتخطبت وربنا يستر بقى عليا لاني بقرالك على طول وبصراحه خايفه من الفتره دي قوي هي حلوه بس تخوف ومنكي نستفيد طبعا ومن خبراتك وادعيلي بقى

لسه بعقلى يقول...

الموضوع كبير يا جماعة معلش مش عارفة ارد عليكم
لكن انا قريت كل التعليقات

لا السياسة ولا التفاهم ولا التقدير هو الحل خاااااااااالص

اوعوا اوعوا اوعوا تتنازلوا عن غضبكم وزعلكم واوعو تيجوا على نفسكم
انا جيت على نفسى كتير وكبرت دماغى كتير قوى خوف من المشاكل

والمشاكل حصلت حصلت
يعنى يتعود على اسلوبك من الخطوبة ويعرف انك حقك تزعلى وتغضبى وتشقلبى الدنيا كلها علشان كرامتك وحقوقك

يا اما يكون متفاهم او يكون ما يستحقش انك تكملى معاه

اشمعنى احنا اللى بنخاف من المشاكل ونهدى الموضوع وهما ما بيهمهمش غير نفسهم ؟

بس مش معنى كده ان احنا نتلكك

الخطوبة دى بداسة المسؤلية

ربنا يوفقكم يارب

osha يقول...

والله كانك بتتكلمى عن خطيبي بجد تعبت وغلبت نفسي مرة اقوله حاجه ويعمل بيها ولما ياخد رايي في حاجه واجيب من الاخر واقوله اعمل اللى يريحك لان ده اللى بيحصل كل مرة يزعل ويقولى يعنى ماخدش رايك وانا غلطان ولما اقوله برضه يعمل اللى هو عايزة ويقولى كده احسن

زهقانة من حياتى يقول...

بصراحة ياجماعه انا بكلمك وانا بعيط بقالى اكتر من ساعتين عايزة اقولكو اخدت خطيبي عن قصة حب رهيبة بس من بعد ماتخطبتلةوالمشاكل كترت وباقيت بعيط اكتر مابضحك والفرحة بقت قليلة اوى بسبب المشاكل اللى زى كدة هو شايفها هايفة وممكن لو حكتلكو انتو عليها تحسو انها هايفة بس مش هايحس بيها اللا اللى مر بالحجات دى وعايزة اقولكو كمان انى كل اما اقرا تعليق الاقية كانكو بتتكلمو عنى اية هى الرجالة كلها كدة بقي ولا اية بجد ممكن حد يقدمى مساعدة لانى استنفزت عدد محاولات مساعدت نفسي ومش عارفة اعمل اية قربت انهااااااااااااار

غير معرف يقول...

حبيبتي اصبري هو انسان طيب في حاجات متشابهه بخطيبي بس مشكلة خطيبي انو حساس زياده عن اللزوم على فكرة هو بيحبك جدا اوعي تصدقي اي كلمة من حد تجرح مشاعر خطيبك انت عارفة لو قلت لخطيبى اي كلمةمن الكلام دي يزعل لدرجة يفضل كتيييييير ميكلمنيش انا اصلحوا بس تعرفي حبني اكتر من الاول عارفة ليه سواهو غلطان او انا انا اللي بصلحوا اوعي تسمعي كلام اللي يقولك تقلي اوعي نصيحة من اختك

غير معرف يقول...

مش عارفة بقي تعملي اية حاجة تجنن فعلا
سايسية وناقشية بالعقل
قوليلة ما تلغيش وجودي ولازم تعملي اعتبار قوليلة الرسول علية
الصلاة والسلام اخد برأي السيدة ام سلمة يعني كان بيعمل لزوجاته اعتبار
والامر شوري او علي الاقل
عايز تعمل اللي في دماغي خدني علي اد
عقلي واقنعني مش اتفاجا انك بتنيمني
وبعدها تعمل الحاجة بردوا
مش عارفة يمكن يجي بالاسلوب دة
وحمد الله علي سلامتك

غير معرف يقول...

انا خلاصى هموت خطيبى جه عندنى من يومين عشان يقعد معايا شويه بس حصلت مشكله بينه وبين ماما وقام ومشهوانا بحاول من ساعته اكلمه وابعتله مسج كتير بس هو مش عايز يرد خالصى وكمان ماينفعش اروح عندهم البيت ومش عارفه اعمل ايه انا بموت كل سنيه وانا مقدرش اعيش من غيره قولولى اعمل ايه انا فعلان بحبه اوى اوى

غير معرف يقول...

انا بنت من العراق مخطوبه من 6 شهور وبعد شهر اتزوج وعشت قصة حب جميله جدا لكن بعد الخطوبه بدأت تكثر المشاكل وتدخل الاهل من الطرفين والان اي مشكله بتحصل بيحملني المسؤوليه ويبعد عني يومين وثلاثه ومايسال عني وهذا الشي يدمرني وحايره شنو اعمل لان مااتحمل بعده عني والله اموت بدونه ....

غير معرف يقول...

انا بنت من العراق مخطوبه من 6 شهور وبعد شهر اتزوج وعشت قصة حب جميله جدا لكن بعد الخطوبه بدأت تكثر المشاكل وتدخل الاهل من الطرفين والان اي مشكله بتحصل بيحملني المسؤوليه ويبعد عني يومين وثلاثه ومايسال عني وهذا الشي يدمرني وحايره شنو اعمل لان مااتحمل بعده عني والله اموت بدونه ....

غير معرف يقول...

انا بنت من العراق مخطوبه من 6 شهور وبعد شهر اتزوج وعشت قصة حب جميله جدا لكن بعد الخطوبه بدأت تكثر المشاكل وتدخل الاهل من الطرفين والان اي مشكله بتحصل بيحملني المسؤوليه ويبعد عني يومين وثلاثه ومايسال عني وهذا الشي يدمرني وحايره شنو اعمل لان مااتحمل بعده عني والله اموت بدونه ....