٨/٠٧/٢٠٠٧

.................................

الاول انا اسفة على تاخير الكتابة بس ده لانى ترددت كتيرقبل ما اقرر انى اكتب فى الموضوع ده
واسفة مرة تانية اذا كان الموضوع هيبقى كلامه تقيل حبتين ...بس بجد قبل ما تقروه انا عايزة اقول ان دى رسالة للشباب ...
عايزة اقولهم اتقوا الله فى البنات
هو كل الحكاية انى هتكلم عن التحكمات ..تحكمات الاهل والخطيب وقبل منهم تحكمات كلام الناس وقبل كل ده حدود الدين
ليه ليه ليه؟
ليه كل التحكمات دى ؟كل ده علشان خايفين عليا ؟
مااااااااشى انا موافقة تخافو عليا ..بس ليه انا بس اللى هيبقى اللوم عليا لو خرجت عن الحدود؟
يعنى هو انا مش بنى ادم زى زيه؟اشمعنا انا اللى افضل واعية وصاحية وخايفة على نفسى ..واشمعنا انا اللى يكون فى ايدى رسم حدود العلاقة بينى وبينه؟ ليه هو كمان ما يخادش نصايح ..لييييييييييييه؟
اشمعنا انا اللى اخد كل التحزيرات وانفذ الاوامر اللى انا معترفة انها هتحمينى ..وهو كل اللى بيعمله انه يمثل انه زعلان لو رفضت انى اسلم عليه او رفضت اى تجاوز للعلاقة بينا ؟ايوة يمثل لانى متاكده ان كل راجل فى الدنيا دى عايز خطيبته تكون قطة مغمضة وترفض اى حاجة غلط ..بيمثل والمفروض انى اصدق تمثيله ده واقوله ما تزعلش احنا كده بنعمل الصح
اشمعنا انا اللى اقعد افكر ازاى اتصرف معاه بشياكة علشان ما يزعلش لما اصده؟
اشمعنا انا اللى يجى اللوم عليا ...
ليه هو من الاصل ما يعملش حاجة غلط؟ليه هو ما يحافظش عليا كانى اخته اللى بيخاف عليها؟اشمعنا هو يختبر اخلاقى وتدينى ويضغط عليا ..هو انا مش بشر ؟مش بنى ادم؟
ما حدش يفهم ان سبب غضبى ده ان فيه حاجة حصلت لا سمح الله
بس هى كل الحكاية انى مش فاهمة ليه البنات هى لازم تبقى عنيها فى نص راسها ...ليه الشاب ما يتقيش ربنا كده وما يحاولش حتى يختبر البنت فى اخلاقها لدام متاكد انها انسانة كويسة
بلاش مكر يا شباب
عايزنها قطة مغمضة سبوها قطة مغمضة على طول
حاجة تجنن

هناك ١٧ تعليقًا:

smraa alnil يقول...

اممممممممممم

موضوع مهم اوي
بس انا عايزة اسالك سؤال
انتي مخطوبة عن حب

لانها تفرق في الكلام كتير
انا حاسة انه جواز تقليدي

قوليلي بس الخطوبة دي مبنية علي ايه

وانا هقولك رايي

catroz يقول...

هو شكل الموضوع فعلا تقليدى
لا حاولى تجدى حل وسط لده كله
مش هينفع تعيشى حياتك كده
...:)

غير معرف يقول...

السلام عليكم

اول زياره ليا فى مدونتك مدونه جميله ويا رب تكون مفيده لينا كلنا

بخصوص الموضوع بقى

هى البنات والسيدات اللى شايلين هم الدنيا كله عشان هم اللى عاقلين ويقدرو يتحكمو فى نفسهم
اما الرجاله بيبقو عندهم برج ضارب ..........عايزين كل حاجه من البنت وفى نفس الوقت عايزينها تقول لا
عايزين يعملو زعلانين عشان يأثرو عليها وترضى تعمل اللى هم عايزينه وفى نفس الوقت يبقى عايزها ماتعبروش
مخلوق عجيب اسمه الرجل
ويقولو علينا احنا اللى مش سهلين!!!!!!!!

بس برضه الرك على التربيه .. يعنى لو هو متربى تربيه اسلاميه هيخاف على خطيبته زى اخته وهيتقى الله فيها
وربنا يهدى

روح يقول...

السلام عليكم
لسه بعقلي وحشتيني ياغاليه بصي
ياست الكل عايزاكي تستخيري
كتير جدا عايزه اقولك لازم تتقبليه
لوتقبلتية هتقبلي منه كل اللي
بيعمله متنسيش دة هيبقي زوجك
علي فكرة انه يغير عليكي دة في حد زاته متعه.

بالنسبة للتجاوزات متنسيش انه بشر
بس دة ميمنعش انك تديه فوق دماغة وتفوقية من حين لاخر ومتنسيش اننا
شرقيين وبحكم دة في حاجات بتتحكم فينا
والاختبارات دي معروفة عند الشباب
استخيري كتير وحطي في دماغك انة هيبقي
زوجك وطاعته واجبة الا فيما يغضب الله

kafrawy يقول...

يا بنتى ارضى بنصيبك
محدش لاقى جواز اليومين دول


طب اقوللك ع حاجة
انا امى مش راضية انى اخطب حتى

و انتى بتشتكى من خطيبك

دة اية اللى احنا فية دة يارب
محدش عاجبة حالة ابدا ......

غير معرف يقول...

مساء السكر
-----------
سمراء النيل
____________
اهلا سمرا ..شكرا جدا انك رديتى عليا بسرعة ..
انا مش فاهمة ايه علاقة الحب والارتباط عن حب بموضوعى ده
انا يا ستى اتخطبت بالطريقة التقليدية يعنى تقدرى تقولى جواز صالونات ...فهمينى بقى ايه العلاقة
شكرا
___________________________________
catroz
________
ايه هو الحل الوسط غير الالتزام .....وهى مش صعبة قوى يعنى مش كل حياتى هفضل مخطوبة ان شاء الله
___________________________________
بندقة
________
اهلا بندقة ..ربنا يخليكى ..يارب انااللى اتعلم منها
بالظبط يا بندقة هو الرك ده
بس هو ممكن يكون متربى واخلاق وابن حلال بس عنده برج ضارب
___________________________________

غير معرف يقول...

سمرا ..نسيت اقولك انى رغم انه جواز صالونات بس بعد فترة حبيت خطيبى ..

غير معرف يقول...

RO7
________
كنت مستنية ردك من بدرى
بجد انا بحبك فى الله كانك اخت بالظبط

طبعا يا روح استخرت الله قبل الارتباط والحمد لله انا متقبلاه زى ما هو كده رغم انه ساعات بيخلينى عايزة انط من الشباك
:)

انا عارفة يا روح انه بشر ...وانا كمان بشر ..هى دى القضية ...اشمعنا انا اللى اديله فوق دماغه ؟
يعنى ليه هو ما يكونش ملتزم من غير حاجة؟

لو اعتبرنا انها اختبارات ..قوليلى انتى كام حاجة كده اختبره فيهم انا كمان ...خلينا مقضينها اختبارات بقى

هحط فى دماغى يا روح ..بس حاسة انك كده بتقوليلى خليكى مطيعة قوى ؟؟
صحيح الكلام ده؟

غير معرف يقول...

kafrawy
_________
اهلا بيك ...
حد قالك انى مش راضية ..راضية الحمد لله بس ده ما يمنعش انى اقول ان فى حاجات بتخلينى اتجنن منه

وماما مش عايزاك تخطب ليه؟اكيد شايفاك لسه صغير على مسؤليات الزواج

اشتكى منه ايوة ...ولا انت شايف ان البنت اول ما تتخطب لازم ترضى بكل حاجة كده وتحمد ربنا انها لاقت عريس وتسيبه يتحكم فيها ويعمل اللى هو عايزه وما تزعلوش؟
انا اكرملى انى احافظ على نفسى من انى ارضى باى حاجة والسلام
بس كده علشان انت ضايقتنى

Ana keda يقول...

انا اول مرة اجى عندك بجد مدونة حلوة اوى وفيها نقاش هادف كده وكويس

بصى يا ستى ربنا يكملك بعقلك دايما
الى بيحدد الموضووع ده كله انتى
انتى
انتى

خلاص اتخطبتوا وعرفتوا بعض الاساس الى هيحطه انتى والله حطيتى اساس على ثقة واحترام وتفهم وكل ده هتستريحى باقى حياتك
وبعدين كل واحد بيشوف الناس بعينه لو هو شايفك كده لالالا مش هينفع خالص
يبقالك قعدة كده وخليكى ذكية بجد متحاوليش تبينى الموضوع جامد اوى كده كده ممكن يتعمد ويضايقك وبعديناصلا هو مش من حقه يتحكم انتى لسه خطيبته لا دين بيقول كده ولا عقل بس الموضوع منك انك بتقولى للعلم بس هو غريب عنك لسه ومفيش حاجة كملت

هدى نفسك بس وكله خير

غير معرف يقول...

ana keda
________
انا هادية خالص اهو ....وامرى لله ...شكلها مافيش غير انى اللى اتحمل مسؤلية شكل العلاقة بيننا ...ماشى هكسب فيه ثواب

شكرا ليكى جدا وتفضلى تدينى رايك دايما

safa7_karmooz يقول...

عفونز للتأخير ...بس كنت بدور على ابن الجيران...ما علينا

انا عايز اضيف بس على كلمة قالتها انا كده تحت ....

انت انتوا لسه فى فترة خطوبة وهى دى اللى بتبقى زى البداية او التمهيد للجواز...
فالمفرووض التحكمات تبقى قليلة شوية...

بس سعادتك لازم مرة تقعدى معاه قعدة عرب ...وتقوليله البنت مش هتحمى نفسها بنفسها...ومعنى الكلمة دى واااااااااااااااااسعه جدا ...

ومن ضمن المعانى ان انتى مش هتعملى كل حاجه ...مش لوحدك يعنى...لازم هوا يبقى معاكى...يبقى طالما هوا قال كذا وكذا دى ممكن تمشى عليكى وعليه ...ليه مش يعملها ...

كلامى متلخبط معلش...بس اللى اقصده ان المفرووض محدش يتحجج للتانى بحاجه مش مفهومة...مثلا يقولك متكلميش ولاد ...ولما تقوليه ميكلمش بنات ممكن يقولك صعب او عشان الشغل او...الخ

القاعده تمشى عالكل مش على واحد بس...ونفس الحكاية للتحكمات ...

وياستى ربنا يسعدك ان شاء الله وتفهمى حاجه من اللى عكيته هنا :D

روح يقول...

السلام عليكم
ازيك ياالغالي يارب تكوني بخير
وبصحة وسلامة وراحة بال
حبيبة قلب روح انا قصدي
علي جملة تتقبلي تصرافاتة
اللي هي مثلا انة يمسك موبايلك او ياخد باسوردك لكن اي تجاوزات تانية
انا عارفاكي جامدة اوي
وهتوقفي اي حد عند حد بس انا عايزة نحط علاج مش نفضل نناقش في المشكلة
ايه رايك تقولي له مثلا
عايزين نعمل ورد يومي نقراه
في وقت معين مع بعض في نفس الوقت
او مثلا تسمعي درس وتقوليلة
نسمعه تاني مع بعض وتتناقشوا فية
احفظوا قرآن مع بعض شجعوا بعض
اتفقوا مثلا ان كل يوم بالليل في ساعة معينة تصلوا ركعتين قيام
لو هو مش ملتزم انت زكية جدا
صحي فية الحته دي ونتيجتها انكم هتقربوا من بعض اوي قوليلة انا نفسي الاقي فيك كذا وكذا
ربنا يريح بالك ياعمري ويوفقك
ويجعلة الزوج الصالح ليكي وادعي انة بان ربنا يخلية الزوج الصالح ليكي
يلة ورمضان داخل كمان
معلش صدعتك اوي وبحبك اوي

Halawa يقول...

أقر أنا الموقع أعلاااااااااااه

إني أتفق مع سيادتك قلبا وقالبا

بس هو للأسف دافع الحرص الزايد المصري
من فوبيا الحياااااة بيعمل كده
وبيغذيه القلق والخوف من بكرة

واضح انك فاهمة الأمور كويس
مش محتاجة كلام ولا توجيهات ولا رأي متقعر

بس لو قدرت أقول لسيادتك
ان دي رسالتي في الحياة دلوقتي

ازاي تبقى بنوتاتنا واخواتنا
جدعااااان قوي
ويختاروا الصح ومايتنازلوش عنه
على حس العادلات والتقاليد

ويمكن أنا مصدقك أوي
لأني عيلتي فيها فوق الخمسين بنت
وأنا الكبير

تحياتي يافندم يالتوفيق

غير معرف يقول...

صباحو عسل
---------
safa7 karmooz
---------------
تصدق فهمت قصدك وكلامك كله
وطبعا عندك حق لازم القاعدة تكشى علينا احنا الاتنين ...بس على فكرة انت مش خدت بالك من اساس موضوعى وهو التجاوزات اللى الخطيب بيبقى عايزها فى فترة الخطوبة وهى مش من حقه
عايزة رايك بجد فى الموضوع ده
البنت زنبها ايه انه يعمل عليها اختبارات ..او انه يبقى عايز يتجاوز حدوده والمفروض ان البنت ترفض وتبقى هى الحيطة السد للتجاوزات دى ؟مش هى بشر برضه؟
---------------------------------

لسه بعقلى يقول...

ro7
------
حبيبتى انا اسفة ان كنت فهمتك غلط فى الاول
واكيد عندك حق
هحاول اعمل بالاقتراحات دى وربنا يسهل
وربنا ما يحرمنى من رايك ابدا
بحبك فى الله
------------
halawa
--------
اهلا بيك ...وشكرا على اتفاقك معايا ..بس حقيقى انا محتاجة رايكم دايما ..قبل ما اتجنن
:)
كويس قوى ...محتاجينك هنا قوى عايزة رايك دايما بحكم خبرتك مع الخمسين بنت
شكرا

عاوزة أفهم يقول...

السلام عليكم
عاوزة اقولك انا بجد مبسوطة انى بكتب ليكى صبرا اختاة الموضوع ده كبير اوى اوى اوى أكيد هاقدر اوضح رايي اكتر من خلال المناقشة
وياريت زى ما بتفكري ايه هية عيوبة بالنسبة ليكى فكري بالعكس برده أكيد هاتفرق